Ўзбекистонда 15-августдан DVB-T стандартида эфирга узатиш тўхтатилади.

09.08.2019

Ўзбекистон Республикаси президенти ва ҳукумат қарорлари асосида «Ўзбекистон Республикаси ер усти рақамли телевидение тармоғини ривожлантириш» инвеститсия лойиҳаси амалга оширилиб, бугунги кунда мамлакатимизнинг барча аҳолиси тўлиқ рақамли телевидение дастурлари қамрови билан таъминланган.
Ўзбекистонда ер усти рақамли телевидениесининг Европа стандарти — DVB-T қабул қилинган.
DVB-T (DVB — инглизча Digital Video Broadcasting — рақамли видео узатиш; Т/Т2 — инглизча Terrestrial — ер усти) — рақамли видеодастурларни эфир (ер усти) орқали узатиш стандарти.
Мамлакатимизда рақамли телевидениега ўтишнинг илк даврларида — 2008-йилдан бошлаб ДВБ-Т стандарти қўлланилган эди. Ўша даврда дунёда рақамли телевидениенинг DVB-T стандарти мавжуд бўлиб, кўп мамлакатлар ушбу стандартни жорий этишган. Йиллар давомида телевидение ривожланиб, рақамли телевидениенинг DVB-T стандарти такомиллаштирилиб, DVB-T2 стандарти яратилиши билан мамлакатимизда ҳам ушбу стандартдаги телеузатгичлар ўрнатила бошлади.
Инвеститсия лойиҳалари доирасида республикамизда DVB-T2 стандартидаги рақамли телеузатгичлар ўрнатилиб, бугунги кунда узатилаётган теледастурлар сони 18-19 тагача етказилди.
DVB-T2 стандарти нимаси билан DVB-T дан устун?
Янги стандарт (DVB-T2)нинг эски стандартдан (DVB-T) асосий афзалликлари — сигналнинг халақитбардошлилиги ва узатиладиган каналлар сонини 18-19 тагача етказиш мумкинлигидир.
2017-йилдан бугунги кунга қадар республикамизда Ўзбекистон Миллий телерадиокомпанияси теледастурлари («Ўзбекистон», «Ёшлар», «Тошкент», «Спорт», «Наво», «Дунё бўйлаб», «Маданият ва маърифат», «Болажон», «Кинотеатр», «Оилавий», «Маҳалла», «Ўзбекистон 24») 2 та стандартда, яъни ҳам DVB-T ва ҳам DVB-T2 стандартларида параллел равишда узатиб келинмоқда. Турган гапки, телеканалларнинг бир-бирини такрорлаши ортиқча ресурс ва сарф-харажатларга олиб келаётганди.
Рақамли тизимда узатилаётган теледастурларни оптимизатсия қилиш, келгусида узатиладиган телеканаллар сонини янада ошириш учун техник имкониятлар яратиш мақсадида, Ўзбекистон Миллий телерадиокомпаниясининг республикамизнинг вилоят марказларида рақамли телевидениенинг эски DVB-T стандартида узатиб берилаётган 12 та теледастури эфирини 2019-йилнинг 15-августидан тўлиқ тўхтатиш режалаштирилган.
Жорий йилнинг 15-августидан қуйидаги стансиялардаги DVB-T стандартида ишловчи узатгичлар ўчирилади:
– Андижон вилоятидаги Андижон радиотелевизион стансиясида 39 ТВК (телевизион канал) частотада ишловчи;
– Фарғона вилоятидаги Қўқон радиотелевизион стансиясида 40 ТВК частотада ишловчи;
– Тошкент вилоятидаги Ангрен радиотелевизион стансиясида 44 ТВК частотада ишловчи;
– Тошкент вилоятидаги Бекобод радиотелевизион стансиясида 27 ТВК частотада ишловчи;
– Тошкент вилоятидаги Шоугаз радиотелевизион стансиясида 35 ТВК частотада ишловчи;
– Сирдарё вилоятидаги Гулистон радиотелевизион стансиясида 32 ТВК частотада ишловчи;
– Жиззах вилоятидаги Қўйтош радиотелевизион стансиясида 45 ТВК частотада ишловчи;
– Самарқанд вилоятидаги Чўпонота радиотелевизион стансиясида 31 ТВК частотада ишловчи;
– Навоий вилоятидаги Лангар радиотелевизион стансиясида 30 ТВК частотада ишловчи;
– Хоразм вилоятидаги Урганч радиотелевизион стансиясида 34 ТВК частотада ишловчи;
– Бухоро вилоятидаги Бухоро радиотелевизион стансиясида 47 ТВК частотада ишловчи;
– Қашқадарё вилоятидаги Одамтош радиотелевизион стансиясида 47 ТВК частотада ишловчи;
– Сурхондарё вилоятидаги Вахшивор радиотелевизион стансиясида 47 ТВК частотада ишловчи;
– Қорақалпоғистон Республикасидаги Нукус радиотелевизион стансиясида 48 ТВК частотада ишловчи узатгичлар ўчирилади ҳамда босқичма-босқич DVB-T2 стандартига ўтказилади.
2019-йил 15-августидан сўнг, МТРК теледастурларини рақамли телевидениенинг DVB-T2 стандартида кўриш мумкин бўлади.
Эски (DVB-T) стандартдаги тюнер ва телевизорлар ишлайдими?
Аввало айтиш керакки, DVB-T2 стандартида узатилаётган теледастурларни эски — DVB-T стандартидаги рақамли сигналларни қабул қилишга мослаштирилган телевизор ва тюнер қурилмалари қабул қила олмайди.
Ҳозир нодавлат («Менинг Юртим», «Миллий ТВ», «Узрепорт ТВ», «Зўр ТВ», «Футбол ТВ», «Севимли ТВ») телеканаллари дастурлари Ўзбекистон ҳудудларига DVB-T2 стандартида узатилмоқда. Агарда телевизорингиз ушбу нодавлат телеканалларини кўрсатаётган бўлса, билинки, сизда DVB-T2 стандарти ишлаяпти. Келгусида ишга тушириладиган янги телеканаллар ҳам DVB-T2 стандартида узатиб берилади.
Телетомошабинлар диққатига!
Шу сабабли, DVB-T стандартида узатилаётган рақамли теледастурларни кўриб келаётган юртдошларимиз DVB-T2 стандартини қўлловчи қурилмаларни (тюнер ёки замонавий русумдаги телевизор) ўрнатишлари лозим бўлади. Шундан сўнггина янгидан-янги ишга туширилаётган телеканалларни томоша қилишингиз мумкин. Эски авлод телевизорлари ёки DVB-T стандартидаги сигналларни қабул қилишга мослаштирилган телевизордан фойдаланувчилар DVB-T2 стандартидаги рақамли тюнер қурилмасини улаган ҳолда қўшимча телеканалларни кўришлари мумкин.
Тавсия: Янги телевизор харид қилаётганда, ушбу телевизорда DVB-T2 стандартида ишлайдиган тюнер бор-йўқлигига эътибор қаратинг! Маҳсулотнинг техник тавсифида бу ҳақда батафсил ахборот берилган бўлади. Бундай телевизор рақамли телевидениега уланиш учун ортиқча қурилмаларни талаб қилмайди. Бугунги кунда мамлакатимиз ва хорижда ишлаб чиқарилаётган аксарият телевизорларда DVB-T2 стандартида ишлайдиган тюнерлар мавжуд. Эски русумдаги телевизорлардан фойдаланувчилар телевизорга DVB-T2 стандартидаги рақамли телесигналларни қабул қилувчи тюнер ва стандарт антеннани ўрнатган ҳолда рақамли теледастурларни кўришлари мумкин.
Diqqat, yangilik!
Ўзбекистон Республикаси президенти қарорига асосан, 2019-йилнинг 1-сентябр куни Ўзбекистон Миллий телерадиокомпаниясининг янги «Ўзбекистон тарихи» телеканали дастурлари эфирга узатила бошланади. «Ўзбекистон тарихи» телеканали дастурлари юқори сифатли HD форматида ҳудудларга ДВБ-Т стандарти орқали узатилиши йўлга қўйилади. Кейинчалик ушбу DVB-T стандартида ишловчи телеузатгичлар модернизатсия қилиниб, босқичма-босқич DVB-T2 стандартига ўтказилади.

Манба: mitc.uz